-
ప్రభుదేవాను ప్రశంసలతో ముంచెత్తిన మాజీ భార్య
ప్రముఖ కొరియోగ్రాఫర్, నటుడు, దర్శకుడు ప్రభుదేవా విడాకులు తీసుకున్న దశాబ్దానికిపైగా గడిచినా, ఆయన మాజీ భార్య రమ్లత్ ఇటీవల ఆయనపై ప్రశంసల వర్షం కురిపించారు. ముఖ్యంగా తమ పిల్లల పట్ల ప్రభుదేవా చూపిస్తున్న ప్రేమ, జాగ్రత్త, బాధ్యతను ఆమె ఎంతో హృద్యంగా గుర్తు చేశారు. ఓ తమిళ యూట్యూబ్ ఛానల్‌కు ఇచ్చిన ఇంటర్వ్యూలో ఆమె తండ్రిగా ప్రభుదేవా పాత్ర, వారి మధ్య ఉన్న ప్రస్తుత బంధం గురించి పలు ఆసక్తికర విషయాలు తెలిపారు.
ప్రభుదేవా – రమ్లత్ దాదాపు 16 సంవత్సరాల పాటు కలిసి జీవించి, 2011లో విడిపోయిన విషయం తెలిసిందే. కానీ విడాకుల తర్వాత కూడా వారు పిల్లల భవిష్యత్తు కోసం మంచి సంబంధాన్ని కొనసాగిస్తున్నారని రమ్లత్ తెలిపారు. “పిల్లలే ఆయనకి ప్రాణం. ఇద్దరు కుమారులతో ఆయనకి ఎంతో దగ్గరైన అనుబంధం ఉంది. ఎలాంటి పరిస్థితులలోనైనా తండ్రీకొడుకుల మధ్య సంభాషణ ఆగదు” అని ఆమె చెప్పారు. పిల్లల విషయంలో ఎలాంటి నిర్ణయం తీసుకున్నా ఇద్దరూ కలిసి చర్చించి తేల్చుకుంటామనీ, తల్లిదండ్రులుగా తమ బాధ్యతను అదే సూచిస్తుందనీ ఆమె వివరించారు.
ఇటీవల చెన్నైలో ప్రభుదేవా తన కుమారుడు రిషితో కలిసి ఒక నృత్య ప్రదర్శనలో పాల్గొన్నారు. ఆ ప్రదర్శన అనంతరం రమ్లత్ ఇచ్చిన ఇంటర్వ్యూలో ఆమె, “రిషి ప్రతిభను చూసి నాకు గర్వంగా ఉంది. ఆ టాలెంట్ వెనుక తన తండ్రి ప్రభావం ఎంతవుందో ప్రతి ఒక్కరూ గుర్తించగలరు. తండ్రి రక్తం ఆయనలో ప్రవహిస్తున్నందునే ఆ మ్యాజిక్ సాధ్యమైందని చెప్పాల్సిన అవసరం లేదు” అని అన్నారు.
గతంలో నటి నయనతారతో ప్రభుదేవా సంబంధం కారణంగా విడాకుల సమయంలో కొన్ని సమస్యలు తలెత్తిన సంగతి తెలిసిందే. కానీ ఆ బాధను తాను పూర్తిగా వెనక్కి వదిలేశానని రమ్లత్ స్పష్టం చేశారు. “విడాకుల తర్వాత ప్రభుదేవా నాకు ఎప్పుడూ గౌరవంగా మెలిగారు. నా గురించి తప్పుగా ఎప్పుడూ మాట్లాడలేదు. అదే కారణంగా నేను కూడా ఆయన గురించి చెడుగా మాట్లాడను” అని పేర్కొన్నారు.
“ఇది జీవితం. ఎదురైన ప్రతి మార్పుని అంగీకరించాలి” అంటూ తాను వాస్తవాలను స్వీకరించి ముందుకు సాగుతున్నట్లు చెప్పారు. రెండో వివాహం చేసుకుని మరో కుమార్తెకు తండ్రిగా మారినప్పటికీ, మొదటి భార్యగా తనపై, పిల్లలపై ప్రభుదేవా చూపిస్తున్న బాధ్యత ఆయన తండ్రిగా ఉన్న విలువను స్పష్టంగా తెలియజేస్తోందని రమ్లత్ వ్యాఖ్యానించారు.
