-
మాజీ ఐ ఏ యస్ ఆఫీసర్ కి కౌంటర్ ఇచ్చిన డైరక్టర్ సందీప్ వంగా
ఢిల్లీకి వెళ్లి ఓ కోచింగ్ సెంటర్‌లో చేరి పుస్తకాలు చదివితే ఐఏఎస్ అవ్వచ్చు, కానీ కేవలం పుస్తకాలు చదివి సినిమా తీయలేరని దర్శకుడు సందీప్ వంగా పేర్కొన్నారు. ఇటీవల ఓ మాజీ ఐఏఎస్ అధికారిని ఉద్దేశించి ఈ సంచలన వ్యాఖ్యలు చేశారు.
ఐపీఎస్ అధికారి మనోజ్ శర్మ జీవిత కథ ఆధారంగా రూపొందిన ‘12th ఫెయిల్’ చిత్రంలో మాజీ ఐఏఎస్ అధికారి వికాస్ దివ్యకీర్తి యూపీఎస్సీ ప్రొఫెసర్‌గా నటించారు. ఆ సినిమా విడుదల సందర్భంగా మీడియాతో మాట్లాడిన వికాస్, ‘యానిమల్’ సినిమాపై విమర్శలు చేశారు. సమాజానికి అలాంటి చిత్రాలు అవసరం లేదని, అవి కేవలం డబ్బు సంపాదనకే ఉపయోగపడతాయని తీవ్ర వ్యాఖ్యలు చేశారు.
ఈ విమర్శలపై దర్శకుడు సందీప్ వంగా తాజాగా ఓ ఇంటర్వ్యూలో స్పందించారు. అప్పట్లో ఆ వ్యాఖ్యలు తనను బాధించాయని, తాను ఏదో నేరం చేసినట్టు అనిపించిందని తెలిపారు. అయితే ఆ ఘటన తనకు ఓ స్పష్టతనిచ్చిందని, ఐఏఎస్ కావాలంటే కోచింగ్ తీసుకుని కష్టపడి చదవాల్సి ఉంటుందని అన్నారు. కానీ సినిమా తీయాలంటే లేదా రచయితగా మారాలంటే ఎలాంటి కోర్సులు లేవని, అంతా అభిరుచి, స్వయంకృషి ద్వారా నేర్చుకోవాల్సిందేనని తెలిపారు.
