-
ఈ ప్రపంచంలో టాలెంట్ ఉన్నా నిరూపించుకోవడం కష్టంగా మారుతోంది : పాయల్
ఆర్ఎక్స్ 100 సినిమాతో ఒక్కసారిగా వెలుగులోకి వచ్చిన పాయల్ రాజ్ పుత్, అనంతరం పలు చిత్రాల్లో నటించినప్పటికీ ఆశించిన స్థాయిలో గుర్తింపు తెచ్చుకోలేకపోయింది. ఈ నేపథ్యంలో ఆమె చేసిన ట్వీట్ చర్చనీయాంశంగా మారింది.
“నటుడిగా కెరీర్ ప్రారంభించడం చాలా కష్టం. ప్రతిరోజూ ఏదో ఒక అనిశ్చితి వెంటాడుతూనే ఉంటుంది. బంధుప్రీతి, వివక్ష రాజ్యమేలుతున్న ఈ ప్రపంచంలో టాలెంట్ ఉన్నా నిరూపించుకోవడం చాలా క్లిష్టం” అని పాయల్ తన భావాలను వ్యక్తం చేసింది.
ఇండస్ట్రీలో ప్రముఖ కుటుంబాల వారికే అవకాశాలు దక్కుతున్నాయనీ, ప్రతిభ ఉన్నా సరైన గుర్తింపు లభించడం లేదని ఆమె పరోక్షంగా వ్యాఖ్యానించింది.
“ఆధిపత్య ధోరణులు విస్తరించిన ఈ (సినీ) ప్రపంచంలో నా శ్రమ, అంకితభావం నిజంగా ఫలితాన్నిస్తాయా అనే సందేహం కలుగుతుంది. పేరుప్రఖ్యాతులు కలిగిన కుటుంబాల వారికి, సమర్థులైన ఏజెంట్లు ఉన్నవారికి అవకాశాలు దక్కడాన్ని గమనించాను. నా ప్రతిభతో నేను ఇక్కడ నిలదొక్కుకోగలనా అని తరచూ ఆలోచిస్తుంటాను. అందుకే నటులుగా ఉండడం కంటే కఠినమైన కెరీర్ మరొకటి ఉండదేమో! ఎందుకంటే ఇక్కడ బంధుప్రీతి, పక్షపాతం లాంటి అంశాలు ప్రతిభను నిలువరించేస్తుంటాయి” అంటూ పాయల్ సోషల్ మీడియాలో తన ఆవేదనను వ్యక్తం చేసింది. ఈ వ్యాఖ్యలపై నెటిజన్లు పెద్ద ఎత్తున స్పందిస్తున్నారు. ఇండస్ట్రీలో ఎవరి అండ లేకుండా వచ్చిన నటీనటులు తమ ప్రతిభను నిరూపించుకోవడం ఎంతటి సవాల్‌తో కూడుకున్నదో వెల్లడిస్తూ, వారసులకు మాత్రం రెడ్ కార్పెట్ పరుస్తున్నారని పలువురు కామెంట్ చేస్తున్నారు.
అయితే, పాయల్ చేసిన ఈ వ్యాఖ్యలపై కొందరు సినీ విశ్లేషకులు భిన్నాభిప్రాయాలు వ్యక్తం చేస్తున్నారు. టాలెంట్ ఉంటే ఎవరి అండ లేకున్నా ఎదగవచ్చని, అవకాశాలు పూర్తిగా వ్యక్తిగత నైపుణ్యంపై ఆధారపడి ఉంటాయని కొంతమంది అభిప్రాయపడుతున్నారు.
