- ఆకలితో రోడ్లపై తిరిగిన రోజులు ఉన్నాయి : డైరక్టర్ వంశీ
సితార, అన్వేషణ, లేడీస్ టైలర్ వంటి చిత్రాలు తెలుగు ప్రేక్షకుల హృదయాల్లో ఇప్పటికీ చెరిగిపోని గుర్తులను వదిలాయి. ఈ సినిమాలు కేవలం కథా కథనాల పరంగానే కాక, సంగీత పరంగా కూడా చిరస్మరణీయంగా నిలిచాయి. తక్కువ బడ్జెట్‌లో నిర్మించినప్పటికీ, దర్శకుడు వంశీ ప్రతిభవల్లే అవి అద్భుతమైన విజయాలు సాధించాయి. గోదావరి తీరాన్ని తన కథలు, పాటలతో మలిచిన వంశీ, టాలీవుడ్‌లో ఓ ప్రత్యేక స్థానాన్ని సంపాదించుకున్నారు.
ఇప్పటికే ఇండస్ట్రీలో 50 ఏళ్లను పూర్తి చేసుకున్న వంశీ, ఇటీవల ఏబీఎన్కు ఇచ్చిన ఇంటర్వ్యూలో తన సినీ ప్రయాణాన్ని గుర్తుచేసుకున్నారు. “నా 50 ఏళ్ల కెరీర్ గురించి వెనుకకు తిరిగి చూస్తే, ఆరంభ దశలో నేను ఎదుర్కొన్న కష్టాలు, కోడంబాకం వీధుల్లో ఆకలితో తిరిగిన రోజులు అన్నీ కళ్ల ముందు కదులుతున్నాయి” అని భావోద్వేగంగా వెల్లడించారు.
అలాగే, “నా సినిమాల్లో సితార నాకు మంచి గుర్తింపు తెచ్చిన సినిమా. ప్రస్తుతం అలాంటి గొప్ప కథ ఒకటి నా దగ్గర ఉంది. గతంలో నాతో హిట్ చిత్రాలు చేసిన ఒక నిర్మాతకు ఆ కథ వినిపించాను. వాళ్లకు బాగా నచ్చింది. ఇందులో మంచి హ్యూమర్, అద్భుతమైన విజువల్స్, చక్కని సంగీతానికి విస్తృతమైన అవకాశం ఉంది. ఈ కథ సినిమాగా రూపుదిద్దుకుంటే మరో మాస్టర్‌పీస్ అవుతుందనే నమ్మకం ఉంది” అని అన్నారు. ఇప్పుడంతా ఆ ప్రాజెక్ట్ ఎప్పుడు పట్టాలెక్కుతుందో చూడాలి!
Read : Sapthagiri : ఈ నెల 21న విడుదలకు సిద్ధమైన పెళ్లికాని ప్రసాద్
